Ishengero Umwungere Mwiza « Bon Berger » mu Burundi ryarahimbaje isabukuru y’imyaka  mirongo itatu n’ine (34) rimaze rikora ibikorwa vyaryo ku mugaragaro, mu makoraniro yo ku musi w’Imana, igenekerezo rya 4 Gitugutu 2026 i Bujumbura. 

Iryo himbaza ryabaye akaryo ko kwibuka urugendo iryo shengero ryaciyemwo kuva ritanguye mu 1992, hamwe n’iterambere ryaryo mu gukwiragiza ubutumwa bwiza, gushinga ayandi mashengero.

Bishop Esron Rutayisire na Pasitori Bimonogoje Immelde, abarongozi biryo shengero, baribukije bimwe mu bihe bikomeye vyaranze urwo rugendo rw’imyaka 34.

Nk’uko bishikirizwa n’abarongozi b’ishengero, “Ishengero Bon Berger mu Burundi ryavutse ku wa 4 Gitugutu 1992, mu igikorane ca mbere c’ivugabutumwa co ku musi w’Imana.” 

Naho ryaciye mu bihe bigoye mu ntango, ryagiye riratera imbere. Abarongozi baryo, bongerako ko iryo terambere ryabaye igikorwa c’Imana, yabayoboye ikongera ikabashigikira muri urwo rugendo.

Mu myaka yakurikiye, iryo shengero ryarongereje inyigisho z’Ijambo ry’Imana, rirashiraho imirwi y’abizera kugira ngo abakristo barushirize gukura mu kwizera, rinashinga ayandi mashengero. Ubu, rifise amashengero 15, imirwi y’abizera ishika hafi 600 i Bujumbura, hamwe n’iyikorera mu mahanga biciye ku buhinga bwa none.

Uretse iryo terambere, Ishengero Bon Berger rirashima Imana ku bw’ubuzima bw’abantu benshi bwahindutse. Mu ntahe zatanzwe n’abarongozi baryo, harimwo urwaruka rwahevye ibiyayuramutwe maze ruva ku marigara, ingo zasubiranye inyuma y’ugutandukana, hamwe n’abantu basubiye kwiyubaka no kugira icizere biciye mu kwizera Yesu Kristo.

Inyigisho za Bibiliya na zo ni kimwe mu bikorwa iryo shengero ryitwararika. Abantu icumi ni bo batanguranye inyigisho z’ishimikiro ry’ubuzima rukristo, ariko ubu abarenga 500 ni bo bazikurikirana.

Mu guhimbaza iyo sabukuru, Ishengero Bon Berger ryarashimiye Imana ku bw’ibikorwa vyayo muri kahise, rinongera kuyizigira ku vyerekeye kazoza.

Abayobozi baryo bibukije amajambo yo muri 1 Samweli 7:12, agira ati: « Uhoraho yaradutabaye gushika n’ubu », bahimiriza abakristo kuguma bibuka ubuntu bw’Imana no kubandanya bayizigira, yabashigikiye muri iyo myaka 34 yose.