Umwepisikopi Eraste Bigirimana wo mw’Ishengero rya Anglikane mu Burundi ,Diyoseze ya Bujumbura, aratera intege abavugabutumwa n’abarongoye amashengero atandukanye kuguma ku rufatiro mu kwamamaza ubutumwa bwiza bwa Yesu Kristo, bakirinda ingendo yo kuba abacangero.

 Mu ruganda rwatunganijwe n’ishengero rya Anglicane, Diyoseze ya Bujumbura, ifadikanije n’ishirahamwe Evangelisation Explosive (EE Burundi) ku cicaro gikuru c’iryo Shengero guhera kw’igenekerezo rya 27 gushika 30 Ndamukiza 2026, Umwepisikopi Bigirimana yibukije abitavye uruganda inshingano yabo nyamukuru ko  bategerezwa gushingira intahe Kristo bashize amanga, akabisigura yishimikije amajambo aboneka mu butumwa bwiza nkuko bwanditswe na Matayo 28:16-20, ahamagarira umuntu wese kwamamaza inkuru nziza y’Umukiza Yesu Kristo.

 Yagize ati: “Imvura igwa canke itagwa, muvugire kristo, kandi yarasezeranye ko ari kumwe natwe imisi yose gushitsa ku muhero w’isi”. “Yesu ntiyabwiye abigishwa ngo bagume mu vyumba, yababwiye bagende basangize abandi ubutumwa bwiza”

 Urwo ruganda rwari rwitabiriwe n’abarongozi bashika 30 bavuye mu ma Paruwase atandukanye agize iyo Doyoseze mu ntumbero yo gukahirizwa ubumenyi harimwo guhabwa inyigisho zijanye n’ubuhinga bw’ivugabutumwa “umuntu ku muntu” mu gikorwa co gushikana ubutumwa bwiza kure.

 Umwepisikopi Bigirimana yavuniye akagohe abavugabutumwa biyitirira ubutumwa bashikiriza mu kubukamisha.

 “Igikorwa c’ivugabutumwa si ikintu duhabwa n’abantu,tugihabwa n’Imana, ikadushoboza. Umuvugabutumwa agowe ni uwubuvuga kukagobero canke nk’umucangero. Aho kwerekana Yesu, akarondera ko ariwe amenyekana.”

 Yasozereye abahamagarira gushikama bakanesha ico cose coza kibatera ubwoba mu gikorwa cabo c’ivugabutumwa.

“Umuvugabutumwa ategerezwa gutsinda ubwoba no kugira ishaka ryo kuvuga Ubutumwa Bwiza, kuko Yesu Kristo yaduhaye itegeko ryo kumushingira intahe amaze kuzuka.”

 Urufatiro rwo Kwizera ni Rumwe 

 Diomède Bintunimana, umwe mu batanze inyigisho ajejwe gutunganya ibikorwa mw’ ishirahamwe Evangelisation Explosive (EE Burundi), yagarutse ku kibazo co gutahura  gutandukanye kuvyerekeye urufatiro rw’ukwizera mu mashengero.

 “Naho amashengero ari menshi, urufatiro rw’ukwizera ni rumwe. Ariko hari igihe usanga no mw’ishengero rimwe abantu batavyumva kumwe.”

 Bintunimana yashimangiye ko ari ngombwa ko abakristo bahura kenshi bakigira hamwe ivy’urufatiro bigize ukwizera kwabo, kugira babe abashinze imizi muvyo bizera kandi bashobore gusangiza abandi ukwizera.

 Urwo ruganda rw’imisi ine rwateguwe mu ntumbero yo gushira mungiro ubufatanyabikorwa buri hagati y’Ishengero Anglicane mu Burundi, Diyoseze Bujumbura  n’ishirahamwe Evangelisation Explosive (EE Burundi)