Mu gihe idini rifatwa nkiritanga icizere mu buzima bw’abakristo  ikibazo gikomeje gutera amadidane bamwe n’abandi: Mbega idini riracari umuti mu kibano canke ryarahindutse igikoresho bamwe bifashisha mu nyungu zabo ?

Mu nkuru yasohotse kw’igenekerezo rya 22 Ndamukiza 2026 , Acher Niyonizigiye, Umwungere n’umuhinga mu vy’uburongozi yibukije imvugo ikunzwe gukoreshwa kenshi ko  idini ryahindutse igikoresho c’akarenganyo, agahotoro n’ubugizi bwa nabi. Akavugako ivyo vyabaye muri kahise  n’ubu bibandanya  mu buzima bw’isi ya none.

« Iyo mvugo si yo yerekana ukuri kwose », Niyonizigiye niko yanditse ku rubuga rwiwe ashikirizako ivyiyumviro.

Naho imvugo nkizo zisa nkaho zashinze imizi mu kibano, Niyonizigiye arazivuguruza ashimitse akavuga ko idini nyabuna ari igikoresho gishingiye mu kwizera rukristo, gufise inkomezi zo guhindura ubuzima bw’umuntu.  

Aha aravuga ati : « Iyo umuntu akwakiriye vy’ukuri, gusubiza umuntu agaciro kiwe, kugakiza imitima no gusubiza itoto imigenderanire yatosekaye »

Uko Vyifashe ku Rubuga

Ibishikirizwa n’uwo muhinga birigaragaza ku rubuga. Kuwa 10 Ndamukiza 2026 Viateur Ciza arongoye ikigo Strong Bridge mu Burundi gifasha abiziziwe n’ibiyayuramutwe, yashinze intahe avuga uko ubutumwa bwiza yakiriye bwamubohoye araheza avavanura n’ingendo yo kwihereza ibiyayuramutwe.

Uyu yafashe ingingo yo gukorera Imana biciye mu bikorwa vy’ishengero yamenyesheje ko ikigo arongoye kimaze gufasha urwaruka rurenga 800 rwiziziwe n’ibiyayuramutwe mu mwaka wa 2025.

Nk’uko bivugwa na Niyonizigiye, ikibazo si ukwizera ubwako, ahubwo ni uburyo umuntu agukoresha.

« Igikoresho categuwe gukora ivyiza gishobora gukoreshwa nabi kigakomeretsa »

Umwihwezo wiwe urashimangirwa na Bibiliya yera. Intumwa Paulo mw’ikete yandikiye Abigalatiya 5 :22 arasigura neza ko ukwizera rukristo kw’ukuri kutagarukira mu bikorwa vy’idini gusa ahubwo ari uguhinduka kw’imbere mu mutima kwibonekeza mu vyamwa vya Mpwemu Yera, navyo akaba ari : urukundo, ubutungane, ukwicisha bugufi no gukorera abandi.

ONGERA USOME:

Gushira Imana Imbere ni Inkingi y’Iterambere: Akamo Gaterwa Abakenyezi Bitunganiriza Imigambi

Niyonizigiye asozera ahamagarira abantu « gusubira ku kuri » nk’umushinge wo  gutahura ukwizera rukristo biciye  mu bugororotsi.