Amashirahamwe rukristo mu Burundi aratera akamo abungere b’amashengero gukomeza igikorwa co kuninahaza (Adoration) Imana biciye mu ndirimbo nk’imwe mu nkingi yo gukomeza ishengero.

Imbere y’ikoraniro ry’abapasitori batandukanye mu Burundi ku musi wa kabiri, igenekerezo rya 3 Ntwarante 2026 mu gisagara ca Bujumbura, Pasitori Joyeux Blaise Ntabareha asanzwe aramutswa ishirahamwe Inganji (Association des artistes chretiens du Burundi) mw’ijambo ryiwe yashimikiye ku kibanza ukuninahaza Imana bifise mu buzima bw’ishengero, gukomeza ubumwe  hagati y’abaririmvyi n’ishengero.

Yagize ati:

“Kuninahaza Imana birarengeye ikibanza tuba turimwo canke umudiho w’indirimbo. Ni ihinduka ry’ubuzima bwacu bivuye kuko twabonye Imana kandi dufitaniye imigenderanire yuzuye nayo.”

Mu nyigisho yiwe yibukije ko  ukuninahaza Imana atari igikorwa co kuririmba gusa, ahubwo ari kimwe mu bigize ubuzima bwa misi yose bw’umukristo. Yifashishije ijambo ry’Imana riri muri Yohani 4:23 ……”Ni ho abasenga b’ukuri bazosengera Data mu mpwemu no mu kuri, kuko Data arondera abamusenga bameze bartyo”, Pasitori Ntabareha asigura ko Imana itarondera abaririmvyi, ahubwo irondera abayininahaza mu mpwemu no mu kuri.

Urwo ruganda rwatunganijwe n’amashirahamwe rukritso mu Burundi Inganji na United Adoration ifadikanije n’ishengero rya Partners Trust International Church(PTI), rwari rwitabiriwe n’ abapasitori b’amashengero atandukanye, abigisha muri za kaminuza ndoramana, hamwe n’abarongozi b’indirimbo mpimbazamana barimwo abaririmvyi bakongera bakaba abungere Apôtre Apollinaire Habonimana na Pasteur Lopez Nininahazwe.

Intumbero nyamukuru  yari iyo gusangira ivyiyumviro ku kuntu ishengero ryoteza imbere igikorwa co kuninahaza Imana biciye mu ndirimbo, mu nyigisho no mu migenderanire myiza hagati y’abarongozi n’abaririmvyi.

Pasitori Ntabareha yagize ati: “Twahamagaye abungere kuko ari abavyeyi b’impwemu b’abaririmvyi turiko turakorera. Twipfuza ko ingabire zabo zokomeza amashengero barimwo n’umubiri wa Kristo muri rusangi.”

Yongeye kuvuga ko igikorwa cabo atari ugusubirira ishengero, ahubwo ari ukuza kurifasha no kurishigikira mu gutunganya neza igikorwa co kuninahaza Imana biciye mu ndirimbo, mu kwandika indirimbo nziza, kuzishira kumugaragaro no kuziha umurongo mwiza wa Bibiliya.

Naho Dr Jean de Dieu Bizimana, aserukira imbere y’amategeko ishengero PTI Church, yasiguye ko ishengero PTI Church hamwe n’amashirahamwe rukristo, United Adoration na INGANJI, bashize hamwe inguvu kugira bafashe abaririmvyi bo mu mashengero atandukanye gukorera mu bumwe no mu gutahura kumwe, kugira ibikorwa vyabo vyubake ishengero rya Kristo mu Burundi.

“Kuninahaza Imana bikunda igihe conyene Imana ikwihishuriye”-Dr Ndikumana

Dr Emmanuel Ndikumana, arongoye ishure ryigisha ivyigwa nyobokamana n’uburongozi mu karere k’ibiyaga binini, Great Lakes School of Theology and Leadership (GLSTL), rifise icicaro I Bujumbura, yarashimiye abateguye urwo ruganda mu kwiyumvira gutumira abapasitori kuko aribo bo bajejwe kurera no kurongora abo baririmvyi.

Naho ku bijanye n’ijambo “kuninahaza”, Ndikumana yasiguye ko kuninahaza Imana bikunda igihe conyene Imana ikwihishuriye; yagize ati:

“Ni inyishu dutanga kuri ukwo guhishurirwa Imana.”

Yongeyeko ko ikibazo gihari muri iki gihe atari ukubura indirimbo, ahubwo ari ukudatahura ico kuninahaza Imana bisigura. Yaburiye abaraho ko inyigisho zidashingiye kw’Ijambo ry’Imana zishobora gutuma abantu baja mu gusenga ibigirwamana aho gusenga Imana Umuremyi.

Naho Bigabo Edouard Muhirwa, umupasitori mw’ishengero Guérison des Ames ryo mu Nyakabiga, yamenyesheje ko ico gikorwa ari inyishu ku masengesho y’igihe kirekire.

“Abaririmvyi barakeneye inyigisho kugira bagire umutima wo kuninahaza Imana vy’ukuri. Ico gikorwa ni inyishu twasengeye kuva kera.”

Yashimangiye ko igikenewe ubu atari umudiho w’indirimbo-yaba izigenda bukebuke canke izinyaruka- ahubwo ari umutima wumvira Imana n’ubuzima bujanye n’ivyo igomba.

Ongera usome:

https://umwungerenews.com/2026/02/gospel-burundi-%f0%9f%87%a7%f0%9f%87%ae-abaririmvyi-bindirimbo-mpimbazamana-bi-burundi-mu-biteramo-mpuzamakungu/

Mu gusozera, Pasteur Joyeux Blaise yahamagariye abapasitori kwemera gukorana no gufatana urugendo kugira ubuzima bw’abakristo mu Burundi ntibwubakire kw’idini, ahubwo nyabuna bushimikire ku migenderanire y’ukuri n’Imana.